FFIs styre
Styret er FFIs øvste organ og er ansvarleg for instituttverksemda.
Styret har ansvar for effektiv organisering og gjennomføring av den samla verksemda i samsvar med gjeldande lover og forskrifter. Dette skal utførast i samsvar med formåla og hovudoppgåvene til instituttet.
Styret utarbeider FFIs årlege budsjett. Det fremjar forslag til basisløyvinga overfor Forsvarsdepartementet (FD), og avlegg rekneskap og årsrapport til FD. Det sitjande styret blei utnemnt av Forsvarsdepartementet for perioden april 2025 til april 2027.
Aslak Tveito
Styreleiar frå 2021
Aslak Tveito er leiar av Simulasenteret (2002–) og professor i numeriske berekningar ved Universitetet i Oslo (1994–). Tveito har tidlegare arbeidd ved Sintef. Han har omfattande erfaring med internasjonalt forskingssamarbeid spesielt med University of California, San Diego og Berkeley. Forskinga hans er i dag knytt til studiet av hjarteceller basert på numeriske modellar, og han rettleier fleire doktorgradsstudentar og yngre forskarar.
Dag H. Stølan
Medlem av styret sidan 2023
Dag H. Stølan er administrerande direktør i Space Norway. Han kjem frå stillinga som konserndirektør for tryggleik og infrastruktur i selskapet. Før han blei tilsett i Space Norway i 2017, opparbeida han seg lang og brei erfaring frå Forsvaret, seinast som generalmajor og sjef for investeringsavdelinga i Forsvarsmateriell. Stølan har både militær og sivil utdanning, mellom anna frå Krigsskolen, Hærens og Forsvarets stabsskular og internasjonale studiar.
Toril Nag
Medlem av styret sidan 2023
Toril Nag er utdanna sivilingeniør innan Computer Science og jobbar som seniorpartner i HitecVision, som er Noregs største PE-fond. Nag har meir enn 25 års industrierfaring frå teknologi og telekommunikasjonsverksemder og dessutan finans. Ho var fram til mai 2023 konserndirektør i industrikonsernet Lyse i Stavanger, der ho leidde forretningsområdet Telecom, som omfattar breibandsoperatøren Altibox, mobilselskapet ICE, og ei rekkje fiberselskap. Nag har brei styreerfaring frå energi- og
teknologiverksemder og var i perioden 2018–2022 styreleiar i bransjeorganisasjonen IKT Norge. Ho har òg vore medlem i ei rekkje regjeringsoppnemnde kommisjonar og råd, mellom anna Digital 21, Digitaliseringsrådet, Personvernkommisjonen og Produktivitetskommisjonen.
Gunnar Bovim
Styremedlem frå 2021
Gunnar Bovim er utdannings- og forskingspolitisk rådgivar ved NTNU. Han er utdanna lege med spesialisering i nevrologi. Bovim har tidlegare vore rektor ved NTNU (2013–2019) og administrerande direktør for Helse Midt-Noreg RHF (2009–2013). Han har brei erfaring frå styre og verv, mellom anna som styreleiar ved NTNU Technology Transfer AS (2021–) og styreleiar i Innovasjon Noreg (2018–).
Lorns Harald Bakstad
Tilsettevald styremedlem sidan 2025
Lorns Harald Bakstad er forskingsleiar for forskingsprogrammet Landoperasjonar ved FFI. Han har vore tilsett ved FFI sidan 2002. Han har jobba med ubemanna plattformer i lufta og på bakken det meste av tida, men også med militære kampkøyretøy og soldatsystem. Sidan 2006 har Bakstad vore prosjektleiar eller forskingsleiar for mange prosjekt og oppdrag for Forsvaret. Bakstad er utdanna sivilingeniør frå NTNU.
Hege Kristin Jødahl
Tilsettevald styremedlem frå 2023
Hege Kristin Jødahl har vore tilsett ved FFI sidan 1993. Ho har mellom anna arbeidd med maskinvareutvikling og programmering av kameraovervakingssystem og eksperiment med overvakingssystem. Jødahl blei prosjektleiar i 2003 og har sidan 2009 vore forskingsleiar for forskingsprogram Ammunisjon. Hege har vore med i Arbeidsmiljøutvalet (AMU) i fleire år og leidd utvalet i to periodar.
