FFI deltek i nytt EU-prosjekt om dumpa ammunisjon
«Ute av syne, ute av sinn» kan ha vore grunntanken då det skjedde. I dag krevst det derimot oversikt over statusen for all ammunisjon som blei dumpa utanfor Europas kystar etter krigen. FFI deltek no i eit stort EU-prosjekt som skal ta tak i problemet.
ammunisjon-(5).jpg?quality=50)
6 millionar euro er sett av til arbeidet, som skal vare fram til mars 2028. Gjennom EU-prosjektet Mmine-sweeper (Marine Munition in Europe - Solutions with Economic and Ecological Profits for Efficient Remediation) er heile tjue institusjonar frå ti land med.
Tre FFI-avdelingar
FFI stiller med folk frå tre avdelingar, som på ulike felt deltek med kompetanse og erfaring. Avdelingane Totalforsvar, Forsvarssystemer og Sensor- og overvakingssystem er med i prosjektet.
– Målet er å samanfatte kunnskapen vi har i dag for å finne og identifisere dumpa ammunisjon på havbotnen og nede i sedimenta. I prosjektet skal ein også vurdere ulike overvakings- og tiltaksmetodar for å redusere risikoen som denne ammunisjonen i dag utgjer, fortel sjefsforskar Arnt Johnsen ved avdeling Totalforsvar.
ammunisjon-(1).jpg?quality=80)
Personell frå minedykkarkommandoen har dokumentert ei rekke ulike typar ammunisjon og eksplosiv langs norskekysten. (Foto Minedykkarkommanden, Forsvaret).
ammunisjon-(2).jpg?quality=80)
(Foto Minedykkarkommanden, Forsvaret)
ammunisjon-(3).jpg?quality=80)
(Foto Minedykkarkommanden, Forsvaret)
Meir enn 30 norske dumpefelt
I Noreg har vi over 30 dumpefelt langs kysten der ammunisjon blei dumpa, rett etter at freden var eit faktum i 1945.
– Det mest avanserte utstyret ein har skal brukast for å finne og identifisere ammunisjon i to av dei norske områda, seier Johnsen.
– Dette vil gi oss verdifull informasjon om kva det er mogleg å finne. Samstundes gir det oss informasjon om utbreiing og mengd av dumpa ammunisjon. Det er også tenkt at det skal gjerast målingar av stoff frå ammunisjonen, for å sjå om desse er byrja å lekke ut i miljøet.
Ammunisjonen lek
FFI har i fleire omgangar fanga fisk og skaldyr i somme av dei norske dumpefelta. Spor av eksplosiv er funne i alle dei felta ein har undersøkt.
– Dette viser at ammunisjonen no har korrodert nok til at stoffa no kjem ut i miljøet. I tillegg ligg det eit stort dumpefelt i Skagerrak der det er søkkt mange fartøy fylte med kjemisk ammunisjon. Også her er det påvist at fisk har spor av stoff frå denne ammunisjonen, fastslår Johnsen.
AMMUNISJON I MJØSA: Også i Mjøsa er det funne mykje dumpa ammunisjon. (Foto FFI).
DUMPA AMMUNISJON: Noko av ammunisjonen som er funnen i Mjøsa. (Foto: Arnt Johnsen, FFI)
Han legg til at det langs norskekysten framleis ligg tallause miner og hundrevis av krigsvrak som vil innehalde ammunisjon. Det blei også dumpa ammunisjon i vatn, elvar og tjern.
Oppstart i Kiel
Deltakerne på oppstartsmøtet for Mmine-sweeper var samla i Kiel i Tyskland i midten av november. Det er Tyskland, ved Geomar, som leier prosjektet.
No startar arbeidet. EU-finansieringa ligg under Horizon-programmet. Prosjektet fekk 15 poeng av 15 moglege ved vurderinga i EU.
– Ein ser fram til banebrytande resultat, konstaterer Arnt Johnsen.