Forsvarsforskingsdagen på Deichmanske bibliotek i Oslo 7. juni hadde nettopp dette som tema: Fleire må bidra med forsvarsforsking. Så kva skal til for at sivile forskarar og institusjonar kan delta?
FFI samla aktørar frå ulike sektorar, både dei som jobbar med forsvarsrelatert forsking og dei som arbeider med rikets tryggleik. Målet var å dele erfaringar og innsikt i korleis forsking, utvikling og innovasjon i større grad kan bidra til å møte tryggingsutfordringane, både dei noverande og dei framtidige.
Langtidsplan krev forsking
Administrerande direktør Kenneth Ruud ved FFI innleidde dagen med å snakke om det breie behovet for forsking, utvikling og innovasjon for eit effektivt forsvar. Statssekretær i Forsvarsdepartementet, Marte Gerhardsen, utdjupa korleis den ambisiøse langtidsplanen til forsvarssektoren fram mot 2036 skal gjennomførast, og kva dette tyder for forskingsinnsatsen.
Det stadig meir krevjande trusselbiletet, med aukande etterretningsaktivitet, blei belyst av Nils Andreas Stensønes. Han er sjef for Etterretningstenesta.
Relevant og i samarbeid
Generalmajor og sjef for plan og utvikling i Forsvarsstaben, Lars Huse, konkretisere kva type forsking som er mest relevant for både Forsvaret og totalforsvaret.
Eit sentralt tema for dagen var korleis samarbeidet mellom sivil og militær sektor kan styrkast, noko som blei gjennomgått av statsråd Sigrun Aasland i Kunnskapsdepartementet.
Praktiske røynsler og føresetnader for å drive forsking for Forsvaret blei diskutert av Terje Jensen frå Nasjonal sikkerhetsmyndighet (NSM), Roar Olsen frå Statens graderte plattformtenester (SGP) og Nina Schjoldager frå Aalborg universitet i Danmark.
Det blei vist konkrete døme og erfaringar frå sivilt-militært samarbeid frå FFIs side. Sjefsforskar Roy Edgar Hansen og forskingsleiar Kim Mathiassen la vekt på kompetansebygging.
Publikum fekk svar
Dagen blei avslutta med ein panelsamtale der administrerande direktør i Forskingsrådet, Mari Sundli Tveit, generalmajor Lars Huse, Nina Schjoldager og Kenneth Ruud diskuterte dei viktigaste problemstillingane som kom fram i løpet av dagen, samstundes som dei svarte på spørsmål frå publikum. Styreleiar Aslak Tveito stod for oppsummeringa.
Vil ha med fleire
FFIs arrangement signaliserer ein klar ambisjon om å bidra til å inkludere fleire forskingsaktørar i arbeidet med å styrke Noregs forsvarsevne. Rett kompetanse, ei forståing for trusselbiletet og ein god tryggingskultur er noko av det som skal til for å bygge bru mellom sivil og militær forsking, og slik møte dei store tryggingsutfordringane Noreg står overfor.
Du kan sjå opptak frå heile møtet i videoen ovanfor.